巴西炒突尼西亞　李察利臣被掟蕉羞辱

最強博彩盤路過關神器《串績王》：http://win.on.cc/football/

巴西出戰世界盃前最後一場熱身賽，周三(28日)凌晨喺法國5比1大炒突尼西亞，「三叉戟」尼馬、李察利臣同拉芬夏比洛尼都有入波，不過李察利臣慶祝入波期間，有球迷向佢掟香蕉，巴西足總即發聲明譴責呢啲種族歧視行為。

巴西賽前聲援喺西甲受種族歧視嘅雲尼斯奧斯祖利亞，11分鐘拉芬夏比洛尼頭槌先開紀錄，突尼西亞18分鐘追平，但1分鐘後李察利臣即回敬1球，當佢慶祝嗰陣，看台上突然有人將條香蕉掟入場內，不過今次李察利臣未有太大反應，隊友費特就將條香蕉踢番去球場外。

巴西之後繼續輕描淡寫，尼馬同拉芬夏比洛尼完半場前各入1球，換邊後巴西明顯「收手」，74分鐘由後備上陣嘅柏度古靴美埋齋，巴西大勝5比1完場。尼馬今場攻入佢喺巴西第75球，距離國家隊史上入球王比利(77球)只差2球，有望喺世界盃期間破紀錄。

巴西足總賽後發聲明譴責「掟蕉」事件：「好不幸，今場發生李察利臣被掟香蕉事件，巴西足總重申對抗種族歧視行為嘅決心。」